Aína, nuevu partíu políticu soberanista y d’izquierda, celebró esti domingu´l so Congresu Fundacional. El Llar de Corvera acoyó a un actu con casi un cientu de persones.
El Grupu Promotor valoraba de manera mui positiva, enantes d’entamar l’actu, el númberu de persones que confirmaren la so presencia nel eventu. Cásique la metá de l’afiliación d’Aína diba participar, al traviés de la so presencia y la posibilidá d’enmendar los documentos propuestos a la militancia. El Congresu escomenzaba ente música y cartelos del partíu, colos aplausos, dando pasu a cuatro hores d’actividá en que les persones asistentes aldericaron y aprobaron delles ponencies de referencia sobre la organización (estatutos, organización, ponencia política y estratéxica…).
A la fin, d’ente les decenes que participaron nel Congresu Fundacional surdió una Mesa Nacional Provisional, compuesta por 19 persones, que van tener la responsabilidá de dirixir los primeros díes de vida de la organización y organizar una Asamblea Nacional pa la que yá esisten una bayura de documentos d’orientación polos que se mandar. Una Mesa con perfiles mui diferentes y que, escoyida por asentimientu de les presentes.
L’actu siguió con una xinta na que, agora de manera más informal, les afiliaes y afiliaos a esti nuevu proyectu pudieron siguir falando sobre’l presente y el futuru d’Aína y d’Asturies.
