El 31 de marzu de 2025, como toes y toos sabemos, perdíen la vida cinco mineros en Zarréu. Yeren cinco persones, con nomes y apellíos, con families, con toa una vida per delantre. La incompetencia d’unos y la desidia y l’ansia de dineru d’otros son les responsables de qu’estos cinco homes nun vuelvan nunca a saludar, a dar un besu, a caminar pel pueblu.
L’aniversariu d’esti accidente con culpables direutos y indireutos qu’enxamás tuvo qu’ocurrir coincidió nel tiempu cola publicación del borrador del dictame de la comisión d’investigación que se formó na Xunta Xeneral d’Asturies pa estudiar les causes y responsabilidaes de la traxedia. Quiciás munchos nun s’alcuerden, pero’l Gobiernu asturianu nun quería qu’esta comisión d’investigación naciere. Nun fueron pocos los representantes de la FSA que salieron en prensa duldando de la utilidá de la comisión y asegurando que namás diba valir pa que PP y Vox consiguieran beneficios eleutorales. El comodín de les dereches, el preferíu del PSOE. Según esti razonamientu más propiu d’un rapacín de siete años, la mayor parte de les asturianes y asturianos, incluyíos munchos votantes de Barbón, nun queríemos saber lo que pasara en Zarréu: el nuestru oxetivu yera regala-y votos a Queipo y a quien vaya ser la marioneta asturiana d’Abascal n’Asturies en 2027. Si nun fuera tan serio y si nun nos tomaran por fatos, sedría pa rise.
Adrián Barbón, por si dalguna persona nel universu nun lo sabe, ye de la cuenca del Nalón y vien de familia minera. Presume a toles hores d’ello. Voi comparame con él. Yo soi de Llangréu y fíu de mineru. La diferencia ye que yo nun milito nel partíu políticu qu’aplaudía coles oreyes cuando dende la Xunión Europea s’aprobó que zarraran les más de les mines de carbón d’Asturies -ensin alternatives llaborales na zona- nin tampoco soi Presidente d’un Gobiernu que nun quería que la Xunta Xeneral investigara les muertes de cinco mineros. Como siempre con Barbón, munches pallabres y pocos fechos, muncho presumir y poca coherencia, muncha cara y pocu trabayu.
De toles maneres, nun ye na sede de la FSA l’únicu llugar nel que tendríen que ponese coloraos. Nel SOMA nun queden atrás. Ye bien conocida la necesidá que tienen de que falen d’ellos na televisión y nos periódicos (cualesquier día dirán que’l Pozu Nicolasa pue sirvir pa instalar una piscina climatizada y que’l Pozu Carrio ye’l sitiu más afayadizu pa criar osos), como tamién son conocíes les crítiques que tán llanzando a los señalaos nel borrador del dictame de la comisión del casu Zarréu: Enrique Fernández, Nieves Roqueñí, Isaac Pola y Belarmina Díaz. Va unos díes que José Luis Alperi, herederu de José Ángel Fernández Villa (herederu nel cargu, entiéndase bien), salía nun programa de la TPA xurando qu’a él naide-y tendría que pidir la dimisión nun casu asemeyáu: él marchaba’l primeru pa casa. Eses declaraciones resulten un migayu estrañes teniendo en cuenta que solo un añu atrás el mesmu Alperi, nesi mesmu programa y cola mesma cara, referíase a Belarmina Díaz, Conseyera d’Industria daquella, como Mimi. Asina, con tol cariñu, como si fueran amigos de tola vida. Cinco mineros muertos y un besín pa Mimi. La cara tan dura como un costeru de carbón. Mieu me daría ser ún de los mineros d’Ibias. Tol ánimu nesta situación tan llaceriante y solo un conseyu: que nun s’enfoten nel SOMA.
De los señalaos nel dictame poco tengo que dicir. A los que siguen venceyaos a la política, pidi-yos dignidá y que presenten la dimisión, anque sé que ye difícil. Hai puestos mui bien pagaos. La inutilidá, si se cunta col carné del PSOE, pue llegar a ser un currículu pimpanudu. Que dalguién-y entrugue al señor Enrique Fernández lo que cobra como Presidente d’HUNOSA y que tome un fervinchu depués pa relaxase.
Dicía enantes que’l Gobiernu asturianu nun quería que la comisión d’investigación de la Xunta Xeneral naciera. Y nun queríen, naide dientro quería. Nin la parte socialista nin la d’Izquierda Xunida. Ovidio Zapico, nesos díes qu’a más d’ún teníen que facelu meter la cabeza ente la tierra, repetía’l discursu de Barbón. ¿Quién necesita l’enemigu fuera cuando lu tenemos na mesma cuenca del Nalón? Non, nun facía falta la comisión. Non, nun facía falta que la Conseyera dimitiera. Non, nun facía falta nada, según paez. Un añu depués, ye Zapico quien pide más responsabilidaes al partíu col que gobierna. El sociu minoritariu del Gobiernu espatuxa como siempre y asume, depués, como siempre tamién. Esta película yá la echaron munches veces esta llexislatura y el final va ser el que quiera Barbón.
Namás unos comentarios finales. Nel PP meyor llavaben la boca enantes de falar de la minería, que teníen a Rajoy como Presidente cuando la fuelga de 2012. Que nun s’atrevan a dar lleiciones. De Vox, poco que dicir. Solo piensen nos derechos de los trabayadores cuando ven un filu del que tirar. Nel restu los casos, colos grandes empresarios y los poderosos. Son el perru más fiel de la urbanización. Y a Covadonga Tomé y Somos Asturies, una entruga/reflexón. ¿Qué van facer en 2027? ¿Dir en coalición con Izquierda Xunida y gobernar con Barbón, cola FSA, colos que nun quieren que s’asuman responsabilidaes polítiques depués de cinco muertes? ¿Qué quieren, ser parte del problema? ¿Nun sedría meyor ayudar a construyir una alternativa?
