“Ensin población, nin actividá, les quemes van seguir siendo la norma nun territoriu que queda ensin nengún tipu de control nin comunitariu nin institucional. Hai qu’aprovechar les carauterístiques naturales d’Asturies, recuperar pa los intereses de la xente que vive nos pueblos, la xestión del mediu y sofitalo too ello dende lo público, con nueves formes de producción que seyan coherentes col mediu y ayuden a la prevención de les quemes” señalen dende Aína.
Dende la formación asturianista defienden “una pedagoxía y una educación basaes na xestión del territoriu, entendida esta como una necesidá social y con participación ciudadana, consecuente. Quemen lo que quemó va poco, nada camuda, ye un ciclu qu’hai que romper y fixase no que corrobora la ciencia no tocante a especies que torguen l’esporpoye de fueos y bones práutiques pa la xestión d’esta Asturies nuestra”
“Nun podemos dexar que se siga vaciando’l rural, ya de por sí avieyáu y masculinizáu, produciendo lloñe, ensin derechos, dexandu de llau’l territoriu, nin siguir ensin planificar la economía pensando na Asturies que tenemos y que queremos, nes posibilidaes de nueves economíes venceyaes a la madera, a la biomasa, en consonancia colos ecosistemes y les sos necesidaes, ensin tener en cuenta la multifuncionalidá agraria y ganadera. Ensin población nin actividá nel rural esto va siguir pasando. Necesitamos un mediu rural asturianu vivu y dinámicu, que nun tolere los atentaos ambientales” apunten dende el partíu.
