El sábadu 7 d’ochobre vuelve a celebrase’l Día de l Reciella nel entornu del Muséu del Pueblu d’Asturies. La décima edición d’esta cita familiar y de baldre alredor de la llingua asturiana entámala l’asociación Reciella: families pol asturianu y va cuntar con actividaes a lo llargo de tol día, dende’l deporte a la música o los talleres infantiles.
Como en toles ediciones, l’eventu promociónase pente medies d’un cantar compuestu específicamente pal Día de la Reciella, que nesti décimu aniversariu ye obra de Nacho Fonseca (Xentiquina).
El cantar interprétalu’l mesmu Fonseca xunta la so fía Esther y la so nieta Manuela, lo que ye un exemplu de la voluntá de Reciella: families pol asturianu por reforciar la tresmisión interxeneracional del asturianu, ún de los puntos débiles pa la pervivencia de la llingua.
El lema d’esta décima edición ye, de fechu, «La familia del asturianu crez», y esta edición plantega un homenaxe a la familia asturfalante Barbón: güela, fíu y nietes.
Esti añu, amás, vuelve la carrera «Entaína» —la primera de les actividaes del Día de la Reciella, a les 11:30—, asina como un mundialín de fútbol, un taller y desfile de moda casero o un conciertu con baille, que va zarrar l’eventu.
L’eventu ta sofitáu dende 2018 pol Conceyu de Xixón y, de magar esta edición de 2023, pol Gobiernu del Principáu d’Asturies.
