La banda avilesina Dixebra va poner el broche final al so 2025 con un conciertu especial el vienres 26 d’avientu, a partir de les 21.00 hores, na sala Tribeca Live d’Uviéu, dientro d’una tradición que’l grupu caltién dende cuantayá: zarrar l’añu con una actuación señalada pa los sos siguidores.
El conciertu, que va tener una duración aproximada de dos hores, convirtióse col pasu del tiempu nun auténticu ritual pa munches y munchos fans, pol ambiente especial que se crea y pol calter de realcuentru. En particular, ye una cita destacada pa quien vive fuera d’Asturies por motivos llaborales o d’estudiu y aprovecha estes feches pa volver a ver a la banda y xuntase colos sos amigos y amigues.
Les entraes tán yá a la venta a un preciu de 15 euros en compra anticipada y de 18 euros na taquilla. Pueden adquirise nel local El Quinto, na Plaza de Riego 10 d’Uviéu, y tamién al traviés del portal web www.epticket.com.
En 2027 el grupu va cumplir cuarenta años de carrera ininterrumpida, un periodu nel que publicaron diecisiete trabayos discográficos y actuaron per toa Asturies, l’Estáu español y distintos países d’Europa, llevando la llingua asturiana y la cultura del país a numberosos escenarios y festivales.
Con motivu d’esta efeméride, la banda yá ta preparando una xira conmemorativa que va arrancar l’añu que vien y va estendese hasta 2027. Nel so percorríu, Dixebra va facer un repasu pola so obra y va ufiertar el so directu habitual, caracterizáu pola mestura d’estilos como’l rock, el punk, el reggae, el ska, el funk o’l folk.
