Nestos díes tamos sintiendo y viendo pasar, n’Asturies y n’otros territorios, el bucle de la xuntanza elleutoral, la xunidá de les izquierdes, el frente ampliu qu’apare les autocracies, les ultradereches y El Mal.
Lo quiciabes curioso del nuevu bucle, ye que, nel ámbetu estatal, lo propón la periferia: Gabriel Rufián, pa ser más esautos, Ágora dientro d’ERC, y onde se tán dando movimientos interesantes. Bildu, dende’l gargüelu d’Arnaldo Otegi, venía a plantegar un estáu de mínimos pa les fuercies d’Euskal Herria y axuntar y atropar les fuercies d’aquel país pa intentar aidar a les matemátiques futures nel Congresu. Dixo, por cierto, daqué bastante interesante en rellación a cuáles yeren los oxetivos de Bildu dientro del Parllamentu Vascu y Navarru, y cuáles nel Congresu Español. Asina, en Catalunya, yá hai movimientos que planteguen la xuntanza elleutoral ente ERC, Comuns, CUP… y ver veremos si se materializa en dalgo sustantivo.
En tou casu, nun ñego que seya necesario, yo mesmu di la brasa antaño y anguaño con ello, pero entiendo que les xuntances o coaliciones por xuntase o coaligase hasta agora, nun tienen nin la solidez, nin el futuru, nin la eficacia, nin la trascendencia, nin la calidez, nin el procuru, nin la proyeición, nin el trunfu que s’espera o quier. Y siempres y en tou casu, han de ser procesos construyíos dende los territorios -independientemente de les rellaciones estatales que tenga quien seya, pues toes elles son conglomeraos, y les sos organizaciones permiten la soberanía territorial-.
Nesti documentu voi plantegar, yá que vivimos nun bucle, el mio propiu bucle plantegáu nel pasáu y que vengo a presentar nuevamente, por si les fuercies que tán llamaes a entendese, -yos fuera d’aida. Intentaré ser lo más conciso y sintético posible.
- Establecimientu d’Espacios de Trabayu por Conceyos
En primer llugar, si esiste voluntá por parte de les formaciones polítiques que seyan, el primer elementu fundamental a construyir ha ser la creación d’espacios de trabayu, d’aniciu, por conceyos, onde les distintes fuercies trabayen específicamente sobre les necesidaes y propuestes d’esi conceyu. Analizando qué puntos son comunes y catalogando qué puntos xeneren discrepancia. D’esa manera se puen trabayar per un llau los puntos en común -que servirán como alcuerdos mínimos-, y d’otra les aspereces pa, con trabayu, y pali que pali, dir xenerando propuestes y nuevos alcuerdos dende les discrepancies.
Una vez queda determináu l’espaciu de trabayu coleutivu, y la separtación funcional de puntos en común y discrepancies, ha d’establecese un segundu espaciu de trabayu:
- Establecimientu d’Espacios de Trabayu por Comarques
Nesti espaciu, los distintos grupos de trabayu conformaos poles formaciones y persones interesaes por conceyos, trabayarán xunto a la resta conceyos de la so comarca. Faciendo’l mesmu itinerariu: Per un llau, establecer los mínimos comunes de Comarca, y per otru, trabayar sobre les propuestes que choquen o que xeneren discrepancies ente los grupos, col envís igualmente qu’enantes, de xenerar posibles alcuerdos nuevos dende les posiciones enfrentaes o que xeneren cierta rocea.- Establecimientu d’Espaciu de Trabayu de País
Nesti espaciu s’axunta’l trabayu desendolcáu polos conceyos y les comarques, amás de trabayar igualmente dende los puntos comunes de calter autonómicu y les propuestes que puean xenerar discrepancies, pa llimar aspereces, pero tamién, pa trabayales y poer resolver propuestes de consensu y alcuerdu.
PUNTOS MÍNIMOS PROPUESTOS DE PARTIDA
Como observador de les dinámiques polítiques albidro que pudieren esistir dellos elementos de consensu:
1.Defensa de los Servicios Públicos d’Asturies -de cualesquier nivel, seya municipal o autonómicu-, que redunda en 0 privatizaciones y 0 concertaciones, procediendo a la municipalización o la vuelta a lo público d’aquellos servicios que foron privatizaos.
2.Reforma del Estatutu d’Autonomía: Compromisu de, si ye posible, Reformar l’Estatutu d’Autonomía ente otres coses pa facer oficial por fin les nueses llingües propies, asina como blindar los derechos sociales y públicos n’Asturies (siguiendo la llinia del puntu 1). En casu de que nun esistan númberos na Xunta, plantegar una estaya trabayu dientro de la Xunta Xeneral sobro la Reforma del Estatutu cola resta de partíos.
3.Defensa específica del Derechu a la Vivienda persiguiendo la tensión habitacional esistente güei, poniendo frenu a la turistificación y acaparamientu d’inmuebles con interés especulativu, habilitando midíes que favorezan l’accesu a una vivienda digna y un turismu responsable.
4.Compromisu na defensa del Derechu de les Muyeres y el coleutivu LGTBI, garantizando con lleis y midíes transversales, la equidá de les persones n’Asturies, la fin de la Discriminación y de les violencies asociaes.
5.Midíes centraes nel combate de la desinformación, los bilordios, discursos d’odiu, etc. Revisión de les perres públiques a medios de comunicación.
6.Compromisu cola defensa del Mediu Ambiente al traviés de la xeneración verde y la industria verde n’Asturies.
7.Ameyora de les redes de comunicación y tresporte internos d’Asturies.
8.Defensa del Padremuñu Cultural y Natural d’Asturies, asina como’l Derechu Consuetudinariu Asturianu.
Como digo estos sedríen puntos xenerales que considero que les fuercies asturianes, que se dicen asturianes y tresformadores, comparten. Por supuestu, hai más, y por supuestu más concretos inclusive.
SOBRO LLISTES Y PROGRAMES ELLEUTORALES
Una de les problemátiques esistentes a la hora d’axuntar sigles ye la de conformar les llistes. Y esto tien de ver coles cuotes de poder, de los egos, y coses pol estilu. Ñegalo sedría una fatada y una irresponsabilidá, pero tamién ser conscientes d’ello y dicilo tal cual, pue ser del too instructivo. Esta xuntanza propuesta que se basa nel trabayu a comuña de les partes, de la querencia real y xenuina d’una ameyora de les vides qu’habiten Asturies, toes; d’un sentimientu real y honestu cola xusticia social; ha de ser más permeable consigo y establecer unos parámetros de confianza necesarios. Esto implica que les famoses llistes han de ser construyíes en primaries abiertes, de persones, y non de perfiles y nomes concretos propuestos polos partíos. Cuanto más tresparente, participativu y honestu colos postulaos integraos, mayor cohesión, fortaleza y emburrie tendrá l’alianza resultante.
En rellación a los programes elleutorales, obviamente bebería de lo trabayao polos trés espacios de trabayu mentaos anteriormente: Conceyos-Comarques-País. Pero tamién na interllocución necesaria colos axentes sociales, vecinales, ciudadanos, esistentes n’Asturies.
Ye imperativo fuxir de la rellación vertical y fugaz ente los partíos políticos y la sociedá organizada. Onde los partíos aconceyen con delles entidaes, tomen delles propuestes, métenles nel programa y nun tornen a tener contautu o siguimientu de consecución con eses entidaes hasta qu’aporten les nueves elleiciones. Polo tanto, debe esistir per parte d’esta alianza un contautu curiaosu y respetuosu cola sociedá organizao. Esto ye que’l contautu con estes entidaes ha de ser regular. Exemplu:
1.Una Entidá fai la propuesta X a la Coalición resultante.
2.La Coalición incorpora al Programa Elleutoral la propuesta X
3.Danse les elleiciones y pue ser que:
a)La Coalición Gobierne
b)La Coalición tea na oposición
4.La Coalición en tou casu ha de caltener el contautu cola Entidá.
a.Faciendo siguimientu de consecución, y de ser aprobáu en Parllamentu-Ayuntamientu, d’aplicación.
b.Plantegando a la Entidá les dificultaes que la Coalición va atopando, en casu dalu, pa xenerar xunto a ella una rempuesta o itinerariu de consecución de la propuesta plantegada superando les torgues, y sobremanera actuando cola honestidá y el curiáu qu’amerita. La información sobro l’estáu de coses, la comunicación nesi aspeutu, ye necesaria pa que les entidaes y la sociedá en xeneral nun tengan la sensación d’aprovechamientu, d’usu, o inclusive despreciu.
Esta forma d’entender la conformación de propuestes interrellaciona necesariamente los Espacios de Trabayu enantes mentaos: Conceyos-Comarques-País, coles entidaes que trabayen nel territoriu de forma direuta.
Dende’l mio puntu vista, la integración d’estos distintos axentes políticos y sociales nun itinerariu de trabayu y tresformación, non solo redunda nun porgüeyu en forma de resultaos pa les formaciones, sinón que, lo más importante, xenera una dinámica de trabayu que permite l’ameyora sustancial de los y les asturianes.
