Llevo dellos díes pensando qu’esti miércoles xubílase Esther Prieto. Y llevo dellos díes pensando lo que pue significar qu’Esther Prieto, que tuvo venceyada a la editorial Trabe dende hai ventiséis años, se xubile. Teo tantos problemes p’axustame a los cambios –anque la vida me llevara a facer cambios vitales abondo serios– que me cuesta almitir, con un egoísmu reconocíu, qu’esto sía verdá. Que la presencia repetida d’Esther al fondude la llibrería Trabe se convirtiera yá en memoria, y que les nueses conversaciones a la mesma vez curties y posaes nesi estragal de la llibrería-editorial nel que nos acomodábamos pa ponenos al día siempre que yo m’averaba a Uviéu nes mios estancies n’Asturies, tendrán que tener dende agora otru escenariu.
Enteréme oficialmente de la so xubilación a principios de xineru, cuando-y mandé un WhatsApp pa saludala y me contó que, según la Seguridá Social, el 25 de marzu diba ser el so últimu día de trabayu. Tragué saliva al lleelu, fícime cargu de lo qu’acababa de lleer, y alcordéme de toles veces que yá Esther anticipara una noticia que yo nunca quixera escuchar. El “dalgún día” nel qu’Esther tendría que retirase, y del qu’ella empezara a falar facía un tiempu, yo decidiera imaxinámelu tan lloñe como deseaba, inclusive sabiendo la muncha falta qu’a toes y toos nos facía recuperar a la escritora que la editora acabara por tragase un poco, quiciás demasiao, durante estos años. Entregada casi tres décades a nutrir les nueses biblioteques cola lliteratura escrita n’asturianu, la poeta, la narradora, la primer escritora ganadora del premiu de novela María Xosefa Xovellanos, foi arrequexándose nesi espaciu espléndidu que convertía les nueses pallabres en llibros, qu’organizaba presentaciones con arrogancia, “bautizando” obres, como dicen los venezolanos, onde hubiera que les bautizar, y regalando’l so tiempu llibre como si-y sobrara.
Por esto mesmo, y anque yá entamamos a echala en falta, sé qu’Esther Prieto merez esta xubilación qu’acaba de llega-y, y teo que dicir que me siento contenta por ella. Prestaríame acompañala nesti momentu xustu nel que s’abre una nueva etapa na so trayectoria vital, da-y un abrazu físicu de despidida, dici-y lo muncho que la so presencia en Trabe representó pa mi, agradece-y, cómo non, la so confianza, y cellebrar la oportunidá que tuvi de conocer a una muyer a la que, amás de la lliteratura, úneme algo tan esencial como’l so xeitu de ver la vida y la so manera de tar nel mundu.
