Anda una parte de la izquierda llamando a conceyu abiertu p’afrontar los problemes de la sociedá asturiana y la batalla electoral y surden, como siempre, dellos de los mantres más repetíos, los llugares comunes de la política de tolos requexos del mundu: “Ye que vien la derechona y va acabar con too si nun vos axuntáis”, “ye que nun vos separten tantes coses”, “son too personalismos” y un llargu etcétera que formen parte de les conversaciones sistémiques nos, cada vegada más avieyaos, entornos de la izquierda n’Asturies.
Ún velo cola sensación de tar, como na película protagonizada por Bill Murray, nel Día de la Marmota. Y asina llevamos cinco décades n’Asturies: faciendo como que se prioriza lo que ye urxente, aquello que tampoco nun se consigue algamar enxamás, y dexando lo importante, pa lo que nunca hai tiempu, parao, de llau.
Hai munches tradiciones polítiques cercanes, pero na que nos reconocemos muncha xente ye na de la izquierda soberanista. En más de 50 años l’asturianismu consiguió munches coses: primero, fundó Conceyu Bable y foi quién a poner la grana pa la recuperación d’un idioma y d’una idea de país que resistió’l pasu del franquismu. Nesi sen, trunfó. Féxolo ensin más puxu que’l de la cai y les aules anque, sicasí, nun foi quién a construyir ferramientes polítiques estables y propies. Non: l’asturianismu nun tien capacidá güei pa dictar lleis que salgan nel BOPA y que puedan camudar les condiciones nes que vive la población asturiana nin da-yos dignidá a les instituciones propies del país.
En 2022, cuando unes doscientes persones formamos Aína, fixímoslo por un sentimientu d’orfandá política: porque nun queríemos que’l filu conductor del asturianismu políticu morriere nesta década, diliéndose n’otros espacios onde se condicionaba mui poco. Sorprendiónos l’acoyida y l’enfotu d’una parte importante de xente, especialmente mozo, que nun sabíemos que miraba tanto por ello. Nun nos presentamos en 2023, priorizando un trabayu de fondu y formación nestos cuatro años, de los que yá pasaron trés…y atopámonos a añu y mediu d’unes eleiciones pa les que nun queremos, otra vegada, los mesmos resultaos. Siguimos trabayando na nuestra propuesta política que va dibuxase nun Congresu nes vinientes selmanes nel que la nuestra militancia va decidir.
A Aína y a otres formaciones que tán dientro y fuera del parllamentu asturianu únennos, sobre’l papel, munches coses. Por exemplu, la defensa de los derechos sociales y los sos servicios, la llucha pola cultura ya identidá propia, el procuru pol mediu nel que vivimos, la refuga a los discursos d’odiu y el militarismu o la necesidá de que’l feminismu siga marcando’l camín pa una sociedá meyor. Pero eso, xente, nun quier dicir que tengamos estratexes y oxetivos comunes, nin que tolos espacios que dicen defender estos asuntos lo lleven faciendo más de 40 años -o de 3 años- y/o cuando tán nel poder.
Y ye que, una cosa ye qu’heba persones con discursos asturianistes en toa triba de partíos políticos del arcu parllamentariu…y otra cosa ye que l’asturianismu tenga’l so sitiu propiu na política asturiana. Una cosa ye que los programes pongan unes coses y, otra, que cuando llega’l momentu de facer polítiques o de negociar estatutos el papel aguante lo que se ve na Xunta Xeneral nos momentos clave.
L’asturianismu nun nació como un logotipu más pa poner xunto con una retafila d’otros: féxolo pa tener, como diría Virginia Woolf, derechu a una habitación propia. Unes eleiciones, compañeres y compañeros, nun son una movilización pola escuela pública nin contra la enésima operación Trumpista, son una declaración d’intenciones. Si fuere eso namás, ¿pa qué taríemos emburriando una propuesta estratéxica cola vocación de que tenga, tamién, soberanía organizativa?
La idea d’asturianizar la política que remanamos n’Aína dende’l so entamu ye mui poderosa: nun va de poner banderines d’Asturies nes fiestes de prau, nin d’aderezar con dalguna caxigalina n’asturianu los discursos. Tampoco de treslladar la realidá de la política electoral estremeña a esta tierra. Supón que l’enfoque de tolo que se faiga tien que tar puestu na realidá demográfica, económica, histórica, cultural y política asturiana. Pensao p’Asturies y dende Asturies, pase lo que pase na corte real madrilana y digan lo que digan los dirixente políticos de la metrópoli. Al nuestru país gobiérnenlu organizaciones que se dicen d’izquierda, a les que se llama a conceyu abiertu, y que tienen al país nuna crisis política, económica y social endémica dende va mediu sieglu. Al estáu español gobiérnenlu les mesmes organizaciones que n’Asturies…y del gobiernu central siguen ensin lleganos más que migayes porque los votos asturianos nun condicionen gobiernos en Madrid sinón que tán pa votar y callar.
En 2027 xuéguense munchos partíos y l’escenariu pue ser múltiple: por exemplu, construyir una alternativa tresformadora que nun tenga amarre directu cola dinámica política d’ámbitu estatal y dotar a Asturies de lo que ye normal nos territorios de la nuestra redolada cantábrica y mediterránea: de propuestes electorales propies non sucursalistes. D’otra banda, podemos siguir cola estratexa de la urxencia: el mieu a lo que pue pasar, el mieu a lo que dicen que va llegar si nun se fai tal cosa, el mieu a lo que nos espera ensin que lo que tenemos nos apurra nada polo que naguamos.
Dalgunos y dalgunes queremos trabayar pola primera d’elles: dexar de dilíse como asturianistes en casa ayena y poner los finxos pa un espaciu colectivu que cuidar, trabayar y ampliar. Nesa ampliación del espaciu políticu asturianista, que sabemos que va muncho más alló de lo que representa Aína anguaño, sí que presta trabayar: con xente nuevo y con calter interxeneracional, con fórmules distintes a les de los posicionamientos defensivos y del mal menor nos que lleven instalaos delles organizaciones nos últimos años. Llograr la meyor versión d’Asturies y atraer a tanta y tanta xente n’Asturies que tien muncho que dicir dende la cultura y dende los movimientos sociales y que nun atopa dende ónde facelo. Ufrir un espaciu abiertu de trabayu y representación de la Política Asturiana, en mayúscules, que desborde hasta onde llega la nuestra influencia.
Pa repetir les mesmes fórmules qu’hai más d’una década, de suma cero, y los mesmos gobiernos, de recorríu conocíu, nun fai falta enredar: yá esisten y yá los conocemos.
Pa crear una cultura política nueva n’Asturies, tamos a tiempu. Hai manes y hai idees. Falta imaxinar un marcu y tirar de l’autoestima colectiva. Con xenerosidá y altor de mires: abriendo’l campu nel que yá tamos. ¿Por qué nun vamos tener les y los asturianos un polu políticu propiu que funcione coles sos referencies y que nun tenga que llevar arrecostines les penitencies de los proyectos estatales? Nesa xera taremos, siempre, a la disposición.
