Anda’l Gobiernu asturianu d’Adrián Barbón gachu, tocáu pol Casu Zarréu, col presidente enfotáu en nomalu Casu Blue Solving pa que toles responsabilidaes pola muerte de cinco mineros queden na empresa y nun lleguen al palaciu presidencial. Lo mesmo pasó col Casu Marea, que los socialistes nomaben Casu Renedo en cuenta de Casu Marea pa que tol marrón por aquel episodiu de corrupción na educación pública se lu comiera una funcionaria. Los medios de comunicación afines obedecieron al poder, inda hai quien lu llama asina.
El gobiernu de Barbón ta solu, bunkerizáu ya encerriscáu refugando reconocer lo evidente, lo que dicen l’informe de la Inspección Xeneral Técnica y el borrador del dictame de la diputada de Somos Asturies, Covadonga Tomé, que ta faciendo un gran llabor na presidencia de la Comisión d’Investigación de la Xunta Xeneral, con independencia y rigor. Esi accidente solo tien un (presuntu) culpable, l’empresariu, pero nun diba asoceder nunca si l’Alministración autonómica cumpliera cola so obligación.
Na defensa de Barbón y el so gobiernu hai qu’entender la so frustración al quedar señalaos por unes práctiques que se dieron tola vida na minería asturiana, dende que surdió fai más d’un sieglu. La industria carbonera siempre vivió de les subvenciones, de los sofitos públicos. Y onde hai perres del Estáu, que financien negocios privaos, apaecen intereses tan oscuros como los pozos mineros, estrañes xuntances, dependencies inconfesables y corrupción a esgaya.
Al coincidir na defensa del sector y de los puestos de trabayu, empresarios mineros, políticos y sindicalistes diben de la mano davezu enantes de la guerra civil y eso nun camudó mayormente dende entós. El SOMA de Manuel Llaneza pactó col dictador Primo de Rivera pa meyorar les condiciones llaborales de los mineros. La mítica mina de San Vicente, autoxestionada pol SOMA, tenía la venta de la producción asegurada porque lo garantizaba l’Estáu p’apurrir a la Marina. Pero como nun llegaba la producción propia de carbón facíase pasar por mineral de San Vicente’l que sacaben d’otros pozos. Cuéntalo con detalle Antón Saavedra, que diz qu’ehí, na mina del SOMA que xestionaben los propios mineros, con Belarmino Tomás y Amador Fernández, Amadorín, al frente, yá apaeció lo que’l que fuera secretariu xeneral de la Federación Estatal Minera d’UGT llama “la trama carbonera”.
Colos fines de l’autarquía franquista y de los grandes beneficios del carbón pal capital privao, la nacionalización del sector y la creación d’Hunosa en 1967 fueron el caberu gran negociu pa munches empreses, como Duro Felguera, que y-endilgaron el muertu al Estáu. L’Institutu Nacional d’Industria (INI) quedábase coles perdes de les mines deficitaries y el capital privao coles esplotaciones rentables. Col sector interveníu y la producción subvencionada, eso yá nun camudó nunca.
L’Institutu Nacional d’Industria (INI) quedábase coles perdes de les mines deficitaries y el capital privao coles esplotaciones rentables
La trama carbonera y la corrupción nel sector siguieron cola democracia. Un llibru d’Antón Saavedra esponía lo que taba pasando nel llibru El fraude de Hunosa y la so salida provocó un escándalu en 1981 col Gobiernu d’UCD, anque siguieron les mesmes práctiques colos socialistes. Facíase pasar carbón d’importación pol nacional pa cobrar les subvenciones. De la mina La Camocha, mítica pal movimientu obreru y l’antifranquismu, porque ehí nacieron les Comisiones Obreres, salía carbón virtual: pasaben por propies una montonera de tonelaes que llegaben en camiones al pozu. Tol mundu callaba; los empresarios pa caltener el negociu, los sindicatos pa facelu colos puestos de trabayu. El SOMA, CCOO y la CSI, que tamién tenía representación nel comité d’empresa. Los empresarios, ente ellos l’exconseyeru Víctor Zapico, que dicía que y-tocara delles vegaes la lotería, acabaron acusaos de dellos delitos ante un xulgáu de lo Penal en Xixón. Pero la víctima al final foi una xueza progresista y feminista, Charo Fernández Hevia, a la que dempués y-anularon la condena. Acabó colando pa Valencia, onde foi maxistrada de l’Audiencia Provincial.
Víctor Zapico entrara en política col PCE nel tardofranquismu y acabó arrimáu al SOMA de José Ángel Fernández Villa, que lu fizo director xeneral de Mines y dempués conseyeru d’Industria, na dómina dorada de la trama carbonera. Na Direición Xeneral de Mines tamién entamó la so carrera política Javier Fernández. Cuando exercía esi cargu faló con Antón Saavedra pa que sacara a la lluz casos de corrupción na minería que’l que diba convertise más tarde en presidente asturianu nun s’atrevía a denunciar. “Ye qu’a ti te fairán más casu”, dicía-y. Javier Fernández, inxenieru de mines, tampoco metió mano a la corrupción na minería cuando llegó a la Presidencia. Nin lo diba facer el so sucesor, Francisco Álvarez-Cascos, que tenía buenes relaciones con Fernández Villa. Lo mesmo pasara enantes con Sergio Marqués, l’otru políticu conservador que llegó a la Presidencia d’Asturies.
Esi pactu non escritu, esa entente cordiale na minería, soterránea como la esplotación del mineral nos pozos, ente gobernantes, empresarios y políticos, nun cesó nunca. Ye verdá que la minería foi vanguardia del gloriosu movimientu obreru y siempre combativa, llegó a facer una revolución. Pero tamién ye cierto qu’a veces les movilizaciones yeren como un decoráu teatral que xuntaba a empresarios y sindicalistes, como pasó cola cabera de 2012, sofitada tanto por Fernández Villa como pol empresariu Victorino Alonso, Don Vito. A estos históricos grupos de presión acabaría sumándose otru, el lobby de los inxenieros de mines, colos que comparte intereses. Los negocios puercos siguieron hasta cuando peslló casi tol sector nesti sieglu, al finar les subvenciones porque’l carbón ye un acelerador del cambiu climáticu y la Unión Europea prohibióles.
N’Asturies siguió’l fraude y la complicidá con empresarios ensin escrúpulos nel Suroccidente, onde nun atoparon la resistencia a los abusos llaborales de la que puede presumir el movimientu obreru nes cuenques del Nalón y del Caudal, nes que la minería tamién algamó grandes avances no que cinca a la seguridá. Na Conseyería d’Industria mandaba’l lobby de los inxenieros de Mines, inxenieres realmente, porque lo fueron les dos últimes conseyeres: Nieves Roqueñí y Belarmina Díaz. Retorcióse la llei pa facer pasar la estracción de carbón por xeres d’investigación, miróse pa otru llau coles illegalidaes y les midíes de seguridá, cuando había previstes inspecciones avisaben enantes.
Lo que pasaba en Zarréu yera un secretu a voces y si daquién denunciaba les milenta illegalidaes too quedaba en voces en castañéu
Lo que pasaba en Zarréu yera un secretu a voces y si daquién denunciaba les milenta illegalidaes too quedaba en voces en castañéu; esi foi’l destín de la denuncia d’un paisanu por correu electrónicu que naide lleó nel Principáu. Sabiénlo’l Gobiernu asturianu, l’Ayuntamientu de Degaña, los sindicatos, los vecinos y los trabayadores, que se quexaben de tar trabayando nun chamizu tercermundista nel que metía mieu entrar con cada relevu. La farsa manteníase pa protexer los puestos de trabayu nuna comarca en crisis pol pieslle de la mayoría de los pozos. Los únicos que nun s’enteraben yeren los del Gobiernu central, que creíen que n’Asturies yá nun había mines. Madrid ta mui lloñe, pamidea.
Del Casu Zarréu lo más ablucante ye que se siguiera mirando pa otru llau dempués del accidente de 2022, nel que morrió un trabayador y otru perdió una pierna por un accidente con un camión que quedó ensin frenos. Que se taba sacando carbón illegalmente y que les midíes de seguridá yeren una llaceria foi lo que pensó tol mundu y hubo denuncies. Pero too siguió igual, el xuiciu por esos fechos tovía nun tien fecha siquiera.
Asina que l’accidente mortal tres años dempués foi la crónica d’una muerte anunciada: la de cinco mineros. Son lo único importante, les víctimes. Tamién les sos families, que tán desamparaes. La Comisión d’Investigación de la Xunta Xeneral nun ye irrelevante, pero qu’ehí apaezan responsabilidaes polítiques, que son evidentes, impórta-yos mayormente a los políticos y mui poco a la xente, que sí se fai otres entrugues; ente otres, cómo ye posible que ún de los mineros fallecíos tuviera prexubiláu.
Nun foi hábil esta vez el presidente Adrián Barbón, que d’habilidaes polítiques va sobráu. Los sos dos meyores conseyeros, los de más pesu y capacidá, Guillermo Peláez y Borja Sánchez, salen malparaos dempués de poner la cara cuando’l presidente taba en México. Sobre too’l conseyeru de Facienda y portavoz del Gobiernu al negar a les families la posibilidá de cobrar indemnizaciones por adelantao, una posición correxida poles protestes y les presiones que se producieron d’inmediato.
El presidente tenía una salida honrosa que nun garró y yá ye tarde pa volver atrás nel camín. La política ye asina de cruel, nun da segundes oportunidaes. Pudo enfotase en que les responsabilidaes polítiques yá les asumiera cola dimisión como conseyera de Belarmina Díaz y zafase de la petición de los ceses d’Enrique Fernández y Nieves Roqueñí, que nun dependen del so gobiernu.
Agora paez atrapáu nun llaberintu, nuna mina escura como la de Zarréu, ensin ser quien a ver la lluz al final del túnel. Ye d’entender el desnorte, como si y-españara ente les manes la bomba de los vieyos negocios puercos de la minería, xusto cuando y-tocó na Presidencia’l pieslle del sector que vertebró Asturies, política, social y económicamente, un sieglu y mediu. Adrián Barbón- de los primeros que cuando yera alcalde de Llaviana s’enfrentó na FSA a Fernández Villa, El Caudillo de les cuenques, que pasó d’héroe a villanu pola corrupción- nun tuvo la culpa.
Pero na Conseyería d’Industria daquién decidió que pagaba la pena emular a Gabino de Lorenzo, otru inxenieru de mines, que cuando se metía nun xaréu d´aquellos que fedía dicía: “Tira p’alantre que llibres”. Y l’exalcalde d’Uviéu llibró, d’eso puede da-y gracies a la xusticia. Col Casu Zarréu nun va pasar lo mesmo, yá cayó una conseyera y ta por ver si ye la única víctima política.
