Como asocede con tolos artistes, a Germán Horacio, nun entamu, nun se-y entendió. Lo d’él, a diferencia de los pintores más académicos, yera aquello que güei conocemos como ‘illustración’, y que’l diariu xixonés El Comercio, na crónica sobre una de les primeres esposiciones del debuxante tan nuevu, daquella con 22 años, definió como «esi tonu reciu de lo qu’anda ente la caricatura y la impresión viva del natural». «Va soltándose-y la manu», dicía’l cronista del estilu de quien, daquella, apenes si se-y conocía como’l fíu d’Emilio Robles, ‘Pachín de Melás’. Sicasí, poco más d’una década más llueu, de la manu de Germán Horacio salió ún de los cartelos más paradigmáticos de la Guerra Civil: esi nel qu’un milicianu forníu del Frente Popular esgaña coles sos propies manes al mostruu reptilianu del facismu. Foi na mesma dómina na que l’artista fixo’l diseñu de los efímeros ‘belarminos’: los billetes de la moneda que, nun tiempu non mui alloñáu al nuesu, emitió una Asturies que taba acabante de proclamar la so soberanía.
Del Comité Provincial al primer ‘belarmín’
La hestoria de los ‘belarminos’ entama de forma bien áceda, como tolo qu’arrodia a la guerra civil. Unes selmanes dempués del golpe d’estáu facista, concretamente’l 6 de setiembre de 1936, formóse’l Comité Provincial del Frente Popular d’Asturies, un órganu políticu destináu a asumir la llegalidá republicana y que resultara de la fusión del Comité Popular de Sama de Llangréu y el Comité de Guerra de Xixón. Intentóse, nun entamu, l’entendimientu ente toles fuercies polítiques defensores del gobiernu llexítimu: presidía’l socialista Belarmino Tomás; la cartera de Guerra llevábala Juan Ambou, comunista; al frente de la Facienda alcontrábase un Rafael Fernández bien mozu, poles JSU, y tamién taben presentes na so cadarma CNT, FAI ya Izquierda Republicana (IR). Les finances, que ye de lo que vinimos equí a falar, manexábense por mediu d’un decretu robláu’l 24 d’ochobre, per mediu del cual Tomás y Fernández autorizaben la emisión de los ‘bonos’, talones al portador de distintos valores, diferenciaos per un códigu de colores, que se cobraben escontra la cuenta de la Caxa Central de Depósitos del Bancu d’España de Xixón.
Cuando’l gobiernu central, ateñáu yá pol avance de la guerra, mandó a parar el 14 de xineru de 1937, día en que’l Ministeriu de Facienda prohibió la emisión de los bonos, el Comité Provincial asturianu yá tuviera que reestructurase díes atrás. Los roces ente comunistes y anarquistes acabaren cola salida d’Ambou (que pasó a Instrucción Pública) de la cartera de Guerra, agora asumida pol mesmu Tomás. Ñacía, el 23 d’avientu de 1936, el Conseyu Interprovincial d’Asturies y Llión. Una de les primeres midíes tomaes pol Conseyu, la emisión de nuevos bonos, frenóse per aquel decretu del gobiernu central republicanu. El dineru de Madrid acabárase… o non. Porque’l Conseyu siguía nes sos trece. El seis de febreru de 1937, les asturianes y los asturianos vieron, per primer vegada, lo que llueu diben conocer como “belarminos”.
El billete que nunca nun salió a la cai
Eso sí, solo na portada del diariu. «Los nuevos billetes que van ponese en circulación», titulaba, na so portada, el periódicu socialista. Amosábase’l diseñu d’un talón de valor de 100 pesetes y desplicábase al llector qu’esti diría impresu en bona calidá, en papel a l’agua, infalsificable; en distintes tonalidaes d’azul y con dibuxos violetes. La intención yera qu’estos billetes circularen solo hasta’l restablecimientu d’una normalidá que nunca nun llegó: «Pasaes les actuales circunstancies, el Bancu va trocar los billetes qu’agora s’emiten por otros análogos a los qu’integraben la circulación hasta’l 19 de xunetu pasáu». Pela so parte, los nuevos billetes diben sustituyir a los anteriores bonos de los primeros tiempos de la guerra. Nun asocedió asina, polo menos, non n’aquel tiempu; los billetes reproducíos pol Avance nunca nun llegaron a les cais porque, a la fin, prefirióse resellar los vieyos bonos.
D’aquellos primeros belarminos conócense solo dos copies, según Panorama Numismático. El motivu amosáu nel so anversu yera, como nun podía ser dotramiente, un tema mineru. Demientres los siguientes meses, la guerra siguió y el problema monetariu nun fixo namái que crecer, igual que los roces col gobiernu central. A finales d’agostu de 1937, acabante cayer en manos del exércitu golpista Santander y yá firíu de muerte’l Frente Norte, el Conseyu declaróse soberanu; Asturies y Llión foron, poro, independientes, y Azaña… Azaña nun lo entendió.
Independencia y papel moyáu
24 d’agostu. Nesa fecha, el Conseyu autoproclamóse soberanu, asumiendo, como recuerda en La Nueva España Ernesto Burgos, «el mandu de les milicies; espublizó edictos y dictó normes como’l zarru de cafés, restoranes, chigres y tabernes, con toque de queda a les diez de la nueche, prohibiendo los aparatos de radiu y los tresllados per carretera ensin autorización». En Madrid nun sentó bien. Manuel Azaña, coles mesmes presidente del gobiernu llexítimu, adelantárase yá a la decisión selmanes enantes, criticando «la ambición escomanada de mandu y de dirixilo tóo» de Tomás, a quien-y achacaba tener l’ambición de «ser ministru de la Guerra y mandar a les tropes». D’aquel alcontronazu surdió, según un artículo recién de Julio Ponce, el calificativu despreciativu de Gobiernín. Pero la cuestión ye qu’aquel ‘gobiernín’ gobernó, fora como fora, y que quiciabes la so decisión más llamativa foi la de recuperar aquellos belarminos -asina foron nomáos pol pueblu, por llevar la firma de Belarmino Tomás-, la moneda asturiana que tuvo una de les duraciones más efímeres de la hestoria: valieron solamente dende la so emisión en setiembre (7 d’ochobre nel casu del de 100 pesetes) al 21 d’ochobre de 1937, el día nel que cayó’l Frente Norte.
Foron, poro, bien pocos billetes. Pero foron nuesos. La figura de los belarminos, aquellos billetes impresos nel Natahoyu xixonés, quedóse grabada nel imaxinariu de los asturianos más na so faceta como papel moyáu que como efectiva moneda de cursu llegal, anque n’efeutu sí lo tuvieren, magar solo nel casu de los billetes de valores inferiores a 5 pesetes (de 0,25; 0,40; 0,50; 1 y 2) y nel de 100 pesetes. Los otros valores previstos, de 25 y 50 pesetes, nun tuvieron tiempu de ponese en circulación. Tóo asocedió tan rápido qu’anguaño tamién se conocen, dacuando, como belarminos -a fin de cuentes tamién diben roblaos por Tomás- a los bonos emitíos en 1936 y reselláos en 1937. Unos y otros convertiríense en papel moyáu cola cayida d’Asturies ente les garres d’aquel fasciu reptilianu de Germán Horacio. Como tamién los suaños de llibertá y soberanía qu’un día, escontra tou pronósticu, llegaron a faese realidá.
