La selmana pasada l’alcaldesa Carmen Moriyón dicía nel plenu que nun se podía asumir agora mesmu la inversión pa rehabilitar y utilizar l’edificiu de los antiguos xulgaos de Prendes Pando porque yera económicamente inviable. Val, puede ser perfectamente verdá, los presupuestos son finitos, pero ye que tamién son orientables, y pa min, esi ye’l tema relevante.
Xixón progresa nel so proyectu de convertise na Málaga del norte, yá falé d’ello nun artículu anterior, xenerando pinacoteques a menos de 200 m p’alimentar l’atractivu turísticu de la ciudá mientres se rinde a la opa hostil d’OTEA que toma les cais col so exércitu de terraces. Nesti proyectu entra Tabacalera, pal qu’hai enriba la mesa 21 millones d’euros que lóxicamente condicionen muncho los presupuestos, que como dicía, son finitos.
Cuando se diz que nun hai perres pal edificiu de Prendes Pando nun podemos quedanos en discutir si les hai o nun les hai, sinón en por qué nun les hai. Qué se priorizó na ciudá pa que la capacidá financiera de la ciudá, bien seya por presupuestu propiu o perres recibíes d’otres instituciones, yá tea comprometida y nun se pueda enfrentar la creación d’un espaciu nuevu que dea servicios sociales a la ciudá, a les y los sos residentes.
Nun digo qu’haya una rellación financiera totalmente directa ente la viabilidá de Prendes Pando y Tabacalera, pero los planes estratéxicos y les decisiones tienen consecuencies, y si la ciudá mira y se preocupa principalmente de dopar la so capacidá de recibir fluxos de persones, esto sí o sí tien consecuencies en desatender les demandes y necesidaes de la xente que vive (y cotiza nella). L’impactu del turismu nuna ciudá y nun país va muncho más allá de la incomodidá pola cantidá de persones en zones y momentos concretos o de los precios na hostelería. Aparte de la so influencia nel sector inmobiliariu, el crecimientu nel fluxu de persones hacia un situ influye nes infraestructures que se proyecten y polo tanto nes nuestres vides. Si vemos que nuna zona llega un momentu en que los servcios nun son atender les necesidaes de la xente que vive ellí nun ye que haya un error, ye que’l plan estratéxicu ta cumpliéndose.
Toi totalmente d’alcuerdu cola alcaldesa en que too nun puede ser, pero lo que tien (tenemos) qu’entrugase ye lo que queremos ser.
