La poeta, novelista, profesora y exconseyera de Cultura del Gobiernu del Principáu d’Asturies Berta Piñán (Cangues d’Onís, 1963) foi gallardonada col Premiu Nacional de Lliteratura Asturiana, que ta dotáu con 6.000 euros, la edición d’un llibru con una síntesis de la so obra y un medayón conmemorativu, que recibirá públicamente nel actu del Día de les Lletres Asturianes, el próximu 8 de mayu, nel Teatru Campoamor d’Uviéu.
El xuráu, presidíu pol presidente de l’Academia de la Llingua Asturiana (ALLA), Xosé Antón González Riaño, concedió’l gallardón por unanimidá a una autora cuya obra percorre’l panorama de la lliteratura asturiana de los caberos cuarenta años, nel que destaca la fondura d’una poesía sentida y sensible, abierta a los problemes cotidianos y del mundu.
Nel acta, el tribunal fai fincapié amás na contribución decisiva de la obra de Piñán a la dignificación de la lliteratura asturiana, al so espardimientu fuera de les llendes de la comunidá y a la so importancia clave nel procesu de recuperación llingüística n’Asturies.
Formaron parte tamién del xuráu los miembros de númberu de la ALLA Ana María Cano, Xosé Ramón Iglesias y Carmen Muñiz; los profesores de la Universidá d’Uviéu Carmen Alfonso y Leopoldo Sánchez; la Premiu Nacional de Lliteratura Asturiana 2023 Lourdes Álvarez; y, en representación del Gobiernu del Principáu, actuó como secretariu Antón García, direutor xeneral de Política Llingüística y Acción Cultural.
