L’agrupación local d’Aína Asturies n’Uviéu denunció esti vienres la especulación inmobiliaria na ciudá al traviés d’una campaña creativa que simulaba anuncios d’alquiler de vivienda dende 300 euros al mes y la venta d’inmuebles por 60.000 euros, una iniciativa que recibió cientos de mensaxes y miles d’interacciones na so páxina web.
La campaña, desarrollada nos últimos díes, incluyó’l repartu de panfletos na cai que reproducíen anuncios inmobiliarios aparentes y la instalación de dos valles publicitaries nos barrios de La Tenderina y La Corredoria. Al dar la vuelta a los folletos, la ciudadanía atopaba un testu coles reivindicaciones del partíu asturianista sobre’l derechu a la vivienda.
Según informó la organización, más d’un cientu de persones punxéronse en contactu col partíu tres la campaña, interesándose por unes ofertes que resultaron ser ficticies y que pretendíen llamar l’atención sobre la dificultá d’accesu a una vivienda digna n’Uviéu.
Los materiales incluyíen tamién un códigu QR que redirixía a la web d’Aína Asturies, que rexistró miles de visites na última selmana, amosando, según la formación, l’impactu y l’ésitu de la iniciativa.
El oxetivu de la campaña foi provocar reflexión y debate social sobre la situación del mercáu inmobiliariu y la distancia ente la vivienda como derechu garantizáu y la realidá actual, marcada, según Aína Asturies, pola especulación y el rentismu.
Dende la organización reiteraron que la vivienda ye un derechu fundamental y reclamaron un cambéu de modelu basáu en polítiques públiques integrales, incluyendo la creación d’un serviciu públicu de vivienda con un parque estable d’alquiler asequible y midíes de protección social pa les inquilines.
Aína Asturies criticó amás les polítiques impulsaes polos gobiernos estatal y asturianu, al considerar que sigan permitiendo la especulación urbanística, la turistificación y la precarización del accesu a la vivienda.
