“El Gobiernu aplaude la llegada d’universidaes privaes”. “Los alumnos de la universidá privada van facer práutiques n’hospitales públicos”. “Les trabayadores de les escueles 0-3, en fuelga escontra’ tratu del Gobiernu”. “El Gobiernu va dar más facilidá a los médicos de la pública pa que trabayen en consultes privaes”.
¿Quién ta a la cabeza d’esi Gobiernu del que falen estos titulares? ¿Juanma Moreno? ¿Ayuso? ¿Trump? Non, al presidente d’esi Gobiernu tenémoslu munchu más cerca. Trátase, como ye de suponer, d’Adrián Barbón, cabezaleru tamién de la Federación Socialista Asturiana (FSA).
Toos estos titulares y otros asemeyaos podíen lleese nes últimes selmanes nos periódicos asturianos y nes redes sociales. Conchita Saavedra, conseyera de Sanidá, apaecía’l miércoles en prensa asegurando que los alumnos de les nueves universidaes privaes que van dir llegando a Asturies van poder formase nel hospital Álvarez-Buylla del Caudal, un hospital públicu. Probablemente la conseyera nun tenía nenguna gana de facer estes declaraciones, pero los medios de comunicación yá taben falando d’esta posibilidá. Obligada pola situación, presentóse énte los micrófonos y, con tonu atristayáu, buscó xustificase. El Gobiernu tien que permitir a los estudiantes de la universidá privada –miles y miles d’euros cuesta cursar una carrera nelles- realizar práutiques na rede pública. Cuando dende esti mesmu Gobiernu s’aplaudía y s’aplaude la llegada d’estes universidaes y nun se movió un deu pa defender la Universidá d’Uviéu -pública y onde estudiemos les más de les persones normales y trabayadores d’Asturies- nun debíen pensar nesta posibilidá. La nuestra universidá pública nun pue aumentar les places de les carreres sanitaries porque nun hai places abondo pa que les estudiantes faigan práutiques, pero pa quien estudie na privada –quien pueda pagar por un güecu- sí hai manera d’atopar una solución.
El Gobiernu más progresista, más d’izquierdes y más defensor de los trabayadores de la hestoria d’Asturies nun se detuvo ehí. Tamién esti miércoles, depués de Sanidá, tocába-y el turnu a Educación. Eva Ledo aseguraba que’l Gobiernu diba estudiar que los institutos y colexos públicos pudieren acoyer a estudiantes de la privada. Ye dicir, que los estudiantes de la Universidá d’Uviéu -y futuros profesores de la nuestra escuela pública- quiciás tengan de competir colos de la privada pa poder realizar práutiques cerca casa. Non contenta con esta, la conseyera tamién defende los conciertos colos colexos privaos, que vuelven a cuntar esti cursu con una financiación bien guapa que sal de los nuestros bolsos, mientres nos institutos públicos hai alumnos pasando fríu o esperando selmanes por una sustitución -en Cangas del Narcea, por poner un exemplu, vamos camín de seis meses pa cubrir una plaza de Cultura Clásica-. Ye entendible quue los conciertos nun puen acabar d’un día pa otru, pero dar más perres a los colexos privaos nun paez una apuesta pola educación pública. Los problemes apaecen tamién nes Escuelines, los centros pa educar al alumnáu ente 0 y 3 años, esi proyeutu tan importante pa les families asturianes y que’l Gobiernu nun toma en serio anque presuma d’él, como amuesen unes trabayadores que lleven protestando, güelgues incluyíes, unos cuantos meses. Güelga, sí, como la que tuvimos de facer maestros/es y profesores pa consiguir dalgunes meyores nel enseñu públicu. Eva Ledo y Adrián Barbón falen bien enchipaos d’esi pautu “Asturies Educa”, pero nunca dicen nada de la hestórica güelga que los obligó a negociar.
Esti Gobiernu vive bastante más de les pallabres que de los fechos. Y, como de discursos paez comer el pueblu asturianu, apaez Barbón nuna reunión del so partíu falando de la necesidá d’asturianizar el PSOE. ¿Cómo? ¿Nun yeren ellos el partíu d’Asturies? ¿Nun ponen la bandera asturiana xunto a les sos sigles como si fueran lo mesmo? Más pallabres, más imáxenes y otra vez menos fechos. Si de verdá apostaren por Asturies, nun tendríen problema en picar na Moncloa y defender el fin del peaxe del Güerna. Pero l’asturianismu nun ta na FSA nin n’Adrián Barbón.
Vienen unos meses en que vamos sentir a esti’l nuestru presidente defender el votu al PSOE pa frenar a la estrema derecha. Apara-yos los pies nun-y importaba tanto a Barbón cuando, la llexislatura pasada, decidió regala-y a VOX un grupu parllamentariu –con Izquierda Xunida conforme-. Y, con esi grupu, más dineru. Y, con eses, perres, más campañes, más publicidá, más voz. Non, frenar a la estrema derecha nun ye financialos. Frenar a la estrema derecha ye apostar polos servicios públicos, pol accesu a la vivienda, por unes polítiques centraes n’Asturies. Y, pa llograr eso, tamién necesitamos frenar a la FSA.
