La fortaleza y la entereza de Fernando González quedóme grabada nel minutu ún de la nuestra rellación, en mayu de 1996, cola mirada severa que me llanzó cuando nos encadenamos xuntos na Comandancia de Marina de Xixón. Pa tratar d’acurtiar la espera, yo amagara con sacar la llave del candáu que llevaba nel bolsu: formaba parte del ‘plan b’ que consensuáramos colos demás compañeros de la CAI (Coordinadora Asturiana pola Insumisión). Yo taba poniéndome nerviosu naquel impasse, cola incapacidá de los policíes pa resolver la situación —Fer y yo encadenaos a ún de los ventanares enrexaos del únicu edificiu militar qu’había en Xixón— y el cantar coñón de la nuesa xente, concentrao ellí, ente nosotros y el Cantábricu, dándonos tira: ¡Ónde tán les llaves, matarile-rile-rile! ¡Ónde tán les llaves, matarile-rile-ron! Pero Fernando nun quería atayos, ye d’eses persones coherentes y decidíes que refuguen los atayos, asina que la llave quedó nen bolsu de los mios pantalones y aguardamos con paciencia a qu’entrara n’escena, torpemente, la cizalla qu’empuñó ún de los uniformaos pa ‘lliberanos’ de les cadenes y pa poder encarcelanos coles dos furgones de la Policía Nacional que salieron d’ellí cagando hosties con nosotros dientro y la nuesa xente aporreándoles y glayando ¡Nun hai prisión que pare la insumisión!.
Con Fer compartí 432 díes de prisión, entramos xuntos y xuntos salimos de la cárcel d’Asturies. A les ocho de la mañana abríen les celdes y en pocos minutos Fernando y Jesus (ensin tilde, pronúnciese “Yesus”), un presu cubano-neoyorquín con musculatura y xenética envidiables, yá taben galguiando alredor del patiu del módulu dos de la cárcel. Yo echaba a correr tres d’ellos intentando resistir el so ritmu… hasta que m’humildaben doblándome na tercer vuelta dambos: el compañeru negru, con un físicu impresionante y una mente feble que lu llevara a prisión por mala cabeza, y el compañeru blancu, con un físicu esmirriáu y una mente de fierro que lu llevara a prisión por defender les sos idees.
A metá de condena’l subdirector de Seguridá de la cárcel quixo joder a Fernando por tener una bandera independentista d’Asturies colgada na paré de la celda: mandólu a la parte interior del módulu, onde tenía como paisaxe una muria de formigón y un enriedu d’alambraes; nun podía relaxar la mirada (esi mirada azul Cantábricu que tien Fer) mirando al monte d’esti país, que ye l’únicu país nel que se reconoz él, que nun dexa de ser por ello internacionalista.
Pero dempués d’aquello Fernando salía a correr al patiu tovía con más brenga. Y años dempués, cuando empezó a espuntar y trunfar en carreres de montañes, en retos estremos (ganó les Cien Milles del Himalaya, completó’l Grand Slam de siete maratones en siete continentes…), llegué a la conclusión de que Fer, que nunca dexó de llau por esos retos les lluches sociales que lu definen y que nunca buscó atayos, taba rompiendo fronteres pa reconquistar l’horizonte robáu na prisión asturiana.
Fernando González presenta’l so llibru El pesu la llibertá (insumisa) esti vienres, a les seis y media de la tarde, na Casa Sindical de Xixón. Y ellí vamos xuntanos insumisos y insumises del pasáu y del presente. Los que daquella nun tragábemos la mentira de que son necesarios los exércitos y los qu’agora nun tragamos esta otra mentira de qu’hai qu’aumentar los gastos militares pa que Rusia nun ‘nos ataque’, que tán espardiendo Margarita Robles, Josep Borrell y compañía. Los insumisos maldicimos los exércitos, el militarismu y toles guerres d’entós y d’anguaño.
