Dixebra vendía más discos que votos sacaba Andecha Astur. Una ácida metáfora que condensa’l pasáu y el presente de lo que foi la izquierda política asturianista, un movimientu que tien nun grupu de música, y non nun partíu nin nuna organización armada, el so principal referente.
A unes hores de recoyer el premiu d’ensayu Yolanda Huergo, Xune Elipe, vocalista de Dixebra, cuéntanos estes y otres coses, falando del so ensayu “¡Da-yos caña! El tiempu y el contestu d’una banda de rock astur”, merecedor d’esti galardón, nel que repasa’l contestu nel que surde esti grupu de rock, l’Avilés industrial y ochentera, ente paru, reconversión, heroína, suciedá, y un asturianismu que miraba a la tradición y non a los barrios obreros. La so música traxo un nuevu movimientu radical y rompedor que nunca terminó de cuayar no políticu y que güei ve a uno de los sos grandes referentes militar en Somos Asturies, dexando claro que nun renuncia al so pensamientu soberanista.
Secando les últimes llárimes por Robe (de la quinta del 62, como Elipe), nun podemos entamar la entrevista sin pregunta-y pol legáu de Jorge Martínez, que morrió esta selmana dexando un recuerdu agridulce ente los munchos asturianistes que compartíen afición polos Ilegales y polos dixebriegos.
Vien de morrer “Jorjón” Ilegal, y a los que somos fans de Dixebra y d’Ilegales viennos a la memoria aquel alcuentru que tuvistis con él nos baños de La Real, cuando vos dixo aquello de “el nacionalismu pa los croates”. ¿Qué recuerdos y sensaciones te dexa alguien como él?
Sí, aquello foi la primer vez que coindimos, nun conciertu d’Amnistía Internacional, a primeros de los 90. Coincidió coles primeres engarradielles del conflictu nos balcanes. Teníamos d’él esa visión visión de macarra y provocador. Dempués d’aquello fuimos coincidiendo en munchos sitios más, y la verdá ye qu’en llinies, xenerales, no personal, yera un buen tipu. Nesti casu, yo téngolo clarísimo anque seya un tópicu, hai que distinguir el personaxe de la persona, porque nun tienen nada que ver. El personaxe tenía les sos lluces y les sos solombres. Había coses d’él como les que dicía sobre l’asturianu y algunes otres cuestiones polítiques, que nun me gustaben muncho. Esplotar la controversia ta muy bien, pero nun entiendo coses como’l cantar de !Heil Hitler!, por exemplu, que pueden llevar a conclusiones y a llugares nada apetecible aunque él nun lo ficiera dende esi puntu. Ye verdá qu’Ilegales marcó una época y contrapuntu nun momentu nel que la movida madrilana taba copándolo too, mientres n’otres zones del Estáu como Asturies o Euskal Herria tábemos viviendo realidaes diferentes, con movilizaciones, crisis, deteníos, represión. Tienen lletres que guei son iconos, como Europa ha muerto, El norte está lleno de frío o Tiempos nuevos, tiempos salvajes.
“El personaxe de Jorjón, con lluces y solombres, nun tenía nada que ver cola persona”
Una de les idees que plantea !Da-yos caña¡ye que Dixebra surde nun ambiente urbanu, de barriu obreru de zona industrial, que rompe col asturianismu daquella, más centráu na tradición de lo rural.
Sí. El llibru céntrase nes circunstancies, los asocedíos y les feches que posiblitaron que n’Avilés pudiera surdir una formación musical de les característiques de Dixebra. Parte del añu 73, na primer crisis del petroleu que llegaría a Asturies y acabaría llevándonos a la reconversión industrial. Nesi contestu, yéremos unos rapazos de barriu d’una ciudá industrial, qu’acabarán viviendo, amás d’esa crisis, el periodu de la llamada transición, o restauración de la monarquía, y el nacimientu del asturianismu contemporaneu. Viníamos d’un ambiente urbanu ya industrial, en contraposición con un asturianismu que taba surdiendo pero ponía los sos güeyos na ruralidá y la tradición, mientres que nos yéremos xente de barriu, que nun tenía relación col mundo rural.
Nun ye fácil evitar el paralelismu entós con grupos como Eskorbuto o Distorsión. ¿Avilés, nesi sen, foi la “marxe izquierda asturiana”?
Sí, y ello ye qu’esos grupos, tuvieron muncha influencia en nosotros, pero sobre too, los que más, Zarama, y el so cantante, Roberto Mosso. El contestu ye bien paecío, colos Altos Fornos en declive, les reconversiones, la problemática de contaminación, la suciedá (n’Avilés, había muyeres embaranzaes a les que-yos salía la placenta negra na ecografía, por mor de la carbonilla que respiraben) , la heroína y un ambiente políticu enrarecíu. Si n’Asturies había violencia obrera, ellí habíala obrera y política.
Avilés, igual que la marxe izquierda del Gran Bilbao, yera una ciudá esfarrapada, con munchos problemes, y afectada pol contestu de los gobiernos de Felipe González, qu’apostó pola güerta mediterránea, y dexó fundir el norte industrial. Mientres en Madrid aparentábase una época d’alegría, amenizada col vacíu de la Movida Madrilana, equí y n’Euskal Herria, atravesábemos un periodu de drogues, represión y paru, nel que se notó la esplosión del punk.
“Aquelles xeneraciones d’asturianistes que salíamos de la comarca avilesina apostamos por una manera d’entender l’asturianismu fuera del del esencialismu”
Ya igual que na marxe izquierda, que tenía mui poca presencia del euskera, n’Avilés nun había muncha presencia de la llingua asturiana. Zarama nun yeren euskaldunfalantes, deprediéronlo de manera autodidáctica y quiseron facer punk na so llinia. Yo sí soi asturfalante, pero non otros miembros de Dixebra. Los pas de Fredi (batería orixinal) yeren gallegos, de los de César Maniegu (guitarra) yeren de Salamanca. Nuna ocasión contabilizóse que’l 70% de la población d’Avilés tenía orixe non asturianu. Si queríes sentir falar asturianu, teníes que dir al mercáu a escuchar a les muyeres de los pueblos.
Por eso munchos asturianistes nos preguntamos por qué Dixebra surde n’Avilés y non na Cuenca Minera.
Pola tradición roquera d’Avilés. Na ciudá había naquel momentu una fervencia de grupos y de tribus urbanes: los heavys, los rockabillys y los punkis. Amás, esi componente del mestizaxe social que tien Avilés dio-yos a los avilesinos un carácter más abiertu.
Puede dicise qu’Ávilés marca entós el carácter de Dixebra y d’un nuevu asturianismu.
Asina ye. Esi mestizaxe marcónos tamién no político. Aquelles xeneraciones d’asturianistes que salíamos de la comarca avilesina apostamos por una manera d’entender l’asturianismu fuera del del esencialismu. Pensábamos que había qu’innovar dende una perspectiva non esencialista. En cuenta de centranos tanto n’asocaciones etnográfiques, pensábamos qu’había qu’abrise dende esa visión zarrada no tradicional, y aljmitir otres producciones culturales que son parte de la cultura nacional asturiana. El rock ye tan parte de la cultura tradicional asturiana como la gaita, y nosotros integramos el rock na cultura asturiana.
Nun dexa de ser curioso que Dixebra acabara tornando nun grupu referencial d’una parte importante de la mocedá asturiana, con lletres que güei son himnos, y sicasí ello nunca se traduxo nuna esplosión d’un movimientu políticu asturianista fuerre.
Tristemente yera realidá. Dixebra siempre vendió más discos que los votos del partíu nacionalista de turnu. Con esto ta too dicho sobre la situación del nacionalismu políticu asturianu. Teníamos más relevancia nosotros, que yéramos un grupu musical, que cualquier grupu políticu. Dixebra amás yera la ponte que facía pasar a xente a la militancia política n’organizaciones, pero les organizaciones polítiques decepcionáronnos a munchos. Yo tamién pertenecí a elles. Pertenecí a Andecha Astur y a otres, y pola poca formación ya inesperiencia, los maximalismos y el dogmatismu, nun momento dau tou esi capital humanu que podíamos aportar a la parte política desaprovechóse.
Vésete quemáu cola parte política del asturianismu. Nel llibru acuses por exemplu a Andecha Astur de ser una organización “sectaria y alloñada” de la realidá del pueblu asturianu.
Soi mui críticu cola parte política del asturianismu, porque quemó a muncha xente. Infinidá de persones mui válides, con carreres interesantes n’ámbitos distintos, que pasaron per determinaes organizaciones, acabaron nun queriendo saber nada d’organizaciones polítiques. Si tou esi capital y tou esi bagaxe tuviera reteníu otru gallu mos cantaría. Tuvimos mala suerte colos cabezaleros de les organizaciones.
El devenir erráticu del asturianismu políticu foi claru. Yera un moviminetu exnovu, recién creáu, mui mozu, y esllumáu polo que pasaba n’Euskal Herria, sin entender qu’esto nun yera Euskadi, y qu’equí, pese a tener componentes asemeyaos, faltaba la conciencia nacional que teníen ellí, y eso facía que lo demás fuere d’otra manera.
Sin embargu, nel llibru nun solo fales d’errores propios. Tamién del obrar del enemigu. La vinculación del CNA col atractu d’ETA al Bancu Herrero d’Uviéu en 1979 llastró, según tu, el futuru del asturianismu políticu.
Sí. Hai que tener en cuenta qu’a partir del añu 75, el referente yera l’asociación Conceyu Bable, que representaba yá un asturianismu rompedor pero mui culturalista. Surdió entós una organización nacionalista más radical y política, que foi’l Conceyu Nacionalista Astur, que yá representaba un nacionalismu asturianu non tan vinculáu a esi mundu rural y a la tradición, y sí a eses lluches urbanes industriales, lloñe del bucolismu. Yo llegué a dir a mitinos, a pegar dalgún cartel, y a tener cierta actitividá con ellos. Pero’l CNA tuvo que desapaecer, pola manipulación que fizo l’establishment cultural, políticu y mediáticu, tantu na derecha como na izquierda, d’esi atracu al Bancu Herrero. Aquel atracu tuvo l’apoyu d’un grupu asturianu al que vincularon col CNA. Ficiéronlo porque tanto la derecha como la izquierda víen como un pelígru’l surdimientu d’un nacionalismu asturianu de calter popular y izquierdista, y aprovecharon l’acción d’ETA. Eso torgó muncho l’avance del asturianismu.
Marchaste d’Andecha Astur y nun quisisti saber más de la militancia n’organizaciones polítiques mientres 20 años. Y sicasí, acabaste en Somos, que nun ye precisamente un fuerza nacionalista nin asturianista. ¿Xune dexó de ser nacionalista?
Cuando vi un pocu’l procesu de Somos, non el d’agora, sinón el d’hai diez años, foi un proyectu nel que s’integró muncha xente mui variao, que veníen de cultures polítiques mui distintes, con presencia social, como Emilio León, Dani Ripa (exvoceru parlamentariu autonómicu de Somos y exsecretariu xeneral), xente con esperiencia na cai, que venía de trabayar nos movimientos sociales y sindicales, nel movimientu pola insumisión. Amás, la organización política que yo consideraba más seria, dientro del asturianismu, Compromisu por Asturies, decidió dar el pasu ya integrase, y aquello animóme, porque vilo bastante serio, bastante realista, con ganes d’influir. Llamáronme Ripa y León, y yo de primeres tenía dudes, pero a traviés de la plataforma Somos Asturies, vi que podía mantener los mios principios, más soberanía y oficialidá, y que la mio entrada nun diba suponer renunciar al mio pensamientu soberanista.
Pero tas nuna organización que nun lo ye.
Hai que ser realistes, y si quies tresformar la realidá hai qu’aceptala, l’asturianismu políticu nun ta organizáu, lo poco qu’hai tien mui poca fuerza, y por sí solu nun va tresformar la sociedá nin cambiar les dinámiques. Tien qu’abrise, y formar lo que yo llamo un polu popular asturianu, que quiera incidir na política real, xuntando federalistes, republicanos, independentistas, confederalistes, y xente d’otres cultures polítiques, pero que tengan la voluntá de facer política pa y por Asturies, priorizando tres principios: soberanía, sociedá y sostenibilidá.
Hai un proyectu entamáu, que se llama Aína.
Ye un proyectu necesariu, tien qu’existir, tien qu’acoyer a les xeneraciones más nueves que tán llegando al asturianismu. Hai un resurdir cultural mui ampliu a nivel de llitratura, música y artes, y tán llegando xeneraciones nueves d’asturianistes que tienen ganes de trabayar dende l’ámbito políticu. Yo considérolu absolutamente necesariu, pero tamién considero necesario a Somos Asturies, porque por nós solos, la capacidá d’incidencia, ye nula, mui poca, baxísima o mui poca.
¿Y nun te paez que Somos puede llegar a ser l’espaciu políticu que siempre ocupó IU, el de los cuatro diputaos a la izquierda del PSOE pa pactar unos años y romper otros?
Hai que tener cuidáu d’a onde podemos derivar Somos, sí, pero la nuestra meta ye derivar a otres coses, conseguir llogros que cambien l’estatus quo d’esta autonmia. Esti PSOE nun ye’l de fai 40 años, pero tien que demostralo, y facer cambios fondos. Pero otru llau hai que velo too y nun mos podemos poner mui esquisitos, porque tamos nun momento crucial históricu. Tolo poco que se ganó nestos 50 años que llevamos podemos perdelo nel 2027. ¿Alguien s’imaxina a un conseyeru de Cultura de Vox? Hai que ser conscientes d’eso tamién. Los principios hai que caltenelos. En toles circunstancies, nes buenes y nes males. Lo que nos toca a la xente progresista del país ye intentar axuntar fuerces, caún dende’l so espaciu, y la so autonomía d’acción, creo qu’hai que desenvolver una unidá d’ación. Llegar a acuerdos de mínimos. Un frente ampliu con un programa de mínimos.
Xune Elipe en Somos y Gabriel Rufián especulando con liderar una candidatura estatal. ¿Vosotros ficistisvos más españoles o la izquierda española más abierta a lo periférico?
(Rises) N’otres zones o territorios igual ta más superáu, pero n’Asturies la tradición d’izquierda xacobina, mui centralista, funcionó nos partíos políticos. La FSA güei ye tovía la única agrupación autonómica que se llama Federación Socialista y no Partíu Socialista del territoriu que seya. El PC hasta primeros de los 90 nun aceptaba la oficialidá y foi ún de los responsables del estatutu d’autonmía que tenemos. Na izquierda asturiana pesó muncho la tradición xacobina. Xente más mozo que yo, activista de movimientos d’izquierdes, tienme dicho coses como que’l bable, “como’l cocu nos potres, pocu y espolvoriáu”, o que lo de “bable nes escueles ye como si pa comer nes escueles pongo siempre fabada”. Y esto téngolo sentío agora. Hai un capítulu especialmente dedicáu a esto. Lo de la izquierda ortodoxa ye una llábana qu’arrastramos dende hai munchu tiempu.
Pero nun te paez que nos movimientos alternativos y reivindicativos n’Asturies l’usu del asturianu ta bastante normalizáu.
Sí, pero porque hubo un puntu d’inflexón, que foi’l movimientu social en favor de la llingua asturiana y el movimientu social del asturianismu, que foi’l qu’emburrió a esa izquierda más xacobina a aceptar esi tipu de cuestiones. El fechu nacional acabó aceptándose más o menos y sin mayores reserves, y hai que que tar arguyosos de lo que se llogró col asturianismu social, al contrario de col políticu. Sicasí, munchos sectores de la izquiera española n’Asturies siguen anclaos en principios del siglo XIX y del XX mientres n’otros llaos evolucionaron.
Centrándonos nel tema musicial, mecer el punk col bable yera tou un retu naquellos años 70 y 80.
Yo nací nel 62, y un día, en 1977, vi un reportaxe na tele sobre l’españíu del punk. Yo taba naquella época militando nel asturianismu, y aquello impactóme muncho. Entamé a interesame por tou aquel movimientu, al mesmu tiempu que m’interesaba también pol asturianismu. Y yá nun hubo vuelta p’atrás. Entamamos ensayando en cocheres, y sitios que nun teníen a veces nin les mínimes condiciones de salubridá. Aprendimos a llevamos bien colos instrumentos enriba de los escenarios.
Sicasí, eso yera nos primeros años. Porque dempués, nun se puede dicir tampoco que Dixebra seya un grupu punk.
Hai bandes que se mantienen fieles al so estilu orixinal, pero ún de los llogros de Dixebra ye que supimos dir evolucionando, supimos dir incluyendo otres sonoridaes, otres testures, del punk, más rudu, más primitivu, al reggae, al ska, al rock, al funky, metal, rap… abriéndonos a una montonera d’estilos y hasta flirtiar cola electrónica. Y con otra manera d’entender el folk, non tanto basao na tradición. Pero sí que la influencia del punk daquella foi decisiva, sobremanera, amás de Zarama, por supuesto The Clash y Kortatu. Anque nesti casu, tola trayectoria de Fermín Muguruza ye una referencia pa nosotros.
¿Veste como Fermín o Evaristo, entamando espectáculos de Xune Elipe a 40 euros la entrada ante miles de persones?
(Rises) Espero que non porque yo nun soi nadie. Soi lo que soi porque tuve unos compañeros musicales tremendos, supe arrodiame de xente que podía dar muncho de sí, y que yera mui solvente. Ello ye que nunca saqué discos en solitario, solo la esperiencia con nome colectivu Soncái System, con Sergio Tutu. Yo en Dixebra puedo ser el comunicador, pero realmente l’aspectu musical sómoslo toos. Tengo la idea y namás. Nun sé música, pero sí sé de música. Sé lo que quiero facer.
Sí ye verdá que mientres muchos años destacasteis como casi la única propuesta con bastante siguimientu nel rock y la música alternativa reivindicativa n’asturianu. ¿Teníeis la sensación de ser los únicos, de que la escena depencía namás de vosotros?
Sí recayó una cierta responsabilida penriba de les nuestres posibilidaes. Hubo una temporada que tábamos namás Dixebra y Los Berrones, y yéremos como isles, anque hubiera munchu más movimientu. Dempués fueron apaeciendo otres propuestes pero tardaron.
Paez que la xente mozo escucha poco Dixebra yá.
Nun espero que masivamente los guahes d’agora sientan pasión por Dixebra porque la so cultura musical vien d’otres coses mui distintes. El rock en xeneral ta de capa cayida, desapaeció de los medios de comunicación y alégrome de que tean surdiendo coses diferentes n’asturianu. Refugo’l reguetón, nun me presta musicalmente nada, pero necesitamos reguetón n’asturianu. Nun se puede piesllar los güeyos y nun ver la realidá. A les xeneraciones nueves qu’empiecen a tener relación cola música gústa-yos otru tipu d’histories. Toi abriendo bastante los oyíos y tán produciéndose coses bien interesantes, y too lo que seya facer contemporánea la llingua asturiana bien bien llegao seya.
