Les declaraciones de la estrema derecha calificando d’insostenible la rede d’escuelines de 0 a 3 años n’Asturies llévennos a reflexonar sobre lo que ye realmente insostenible na nuestra realidá actual y más cercana.
Insostenible ye que les muyeres sigamos dexando de trabayar o reduciendo les nuestres xornaes pa poder cuidar a les nuestres fíes y fíos. Pero esto nun ye un problema pa la derecha, que tien mui claro cuál ye’l nuestru sitiu y el nuestru papel na sociedá.
Insostenible ye que n’Asturies se siga aumentando añu tres añu la partida presupuestaria pa la enseñanza concertada. Pero pa la derecha, y tamién pa una parte de la que se fai llamar izquierda, nun ye un problema que los fondos públicos los xestionen fundaciones privaes, que disponen y contraten ensin tresparencia y buscando siempre’l máximu beneficiu, como empreses que son.
Insostenible ye l’afirmación de que les profesionales que trabayen nes escuelines o en cualquier otra etapa na enseñanza pública asturiana adoctrinen, cuando los centros concertaos que tanto reivindiquen seleccionen al so personal desixendo-y compromisu pa col “carácter” y los “valores” de la empresa.
Insostenible ye que nun se pueda vivir nes zones más alloñaes del centru d’Asturies porque nun hai servicios públicos. La derecha llena la boca afirmando que representa al rural asturianu pero la realidá ye que nun-y importen nada les condiciones de vida de les persones que quieren habitalu.
Insostenible sería desaprovechar la oportunidá d’integrar la etapa 0-3 na rede educativa pública, dotando de condiciones xustes y igualitaries a les sos trabayadores, y reconociendo de verdá esta etapa educativa como fundamental pal futuru de los nuestros neños y neñes.
