El 22 de xineru espublizaba en Nortes un nuevu artículu alrodiu’l bucle infinitu de les unidaes efímeres, y cómo, dende la mio humilde opinión, podemos armar y encadarmar una propuesta política asturiana que participe con voz propia tanto na Xunta Xeneral como nos comicios estatales, seya o non que’l camín abiertu por Rufián y otros catalanes como Joan Tardà, llegue a bon términu.
Continúen los contautos n’Asturies y nel Estáu pa conformar espacios de participación amplios a la izquierda del PSOE con un enfoque soberanu y soberanista de y en los territorios, y nesi espaciu habríen de tar toes aquelles formaciones que, siguiendo col títulu del anterior artículu, se dicen tresformadores.
Equí quiero sorrayar una máxima que foi constituyente en Bildu, quien atropa delles formaciones polítiques, y onde esta máxima qu’agora voi comentar, llueu amplíase más alló de Bildu nuna posición territorial y territorializada que, como digo, escede esi movimientu políticu concretu.
Esta máxima vien a dicir que primero’l pueblu, llueu’l partíu; asina como observar quién se coloca tres la pancarta cuando los drechos son arrebataos polos de Siempres. Y estes dos reflexones son pertinentes equí, yá que curiosamente, munches fuercies polítiques d’Asturies, son quien a plantegar quiciabes vetos, maltares -normalmente personales-, inquines, o suspicacies, pero llueu, les sos militancies, comparten constantemente pancartes: Pancartes pola Oficialidá, poles Pensiones, pola Sanidá Pública y Universal, pola Educación Pública y Universal, polos Drechos de les Muyeres, polos Drechos LGTBIQ+, Escontra’l Pieslle d’empreses y despíos, pol Respetu y Curiáu del nuesu Padremuñu -seya esti cultural o natural-, pol Drechu a una Vivienda Digna, Escontra’l Racismu y la Xenofobia, pola Llibertá de Les Seis de la Suiza, y un llargu etcétera que resulta absurdo cuando lleguen comicios elleutorales y tenemos n’Asturies la friolera d’ocho formaciones polítiques, unes más anecdótiques qu’otres en cuantes a resultaos, pero ocho (nes caberes). Y esti, permitíime, absurdu lo que xenera ye na práutica milenta manifestaciones más pa “resistir”, pa “frenar l’avance de”, colocándose toos y toes tres de la mesma pancarta -eso sí, una vez que’l drechu que fuere ye menaciáu o cenciellamente desaniciáu-
L’articulación d’esi espaciu políticu asturianu qu’afonde nel autogobiernu, na soberanía enerxético, alimentario, el drechu a la vivienda y nel fortalecimientu los servicios públicos fundamentales como son la educación, la sanidá, la defensa de los nuesos ecosistemes, la dependencia o’l tresporte, ye necesario p’Asturies no interno, pero tamién n’Asturies no esterno.
Güei vivimos, nun ye nuevo, nun contestu global qu’atropella cualesquier intentu de tomar la vida con calmia. Condiciónamos a cada segundu, y ye tremendamente voraz y feroz. La posición d’Asturies nesi contestu, nos contestos onde participa, pues la realidá ye testerona, ha de ser contemplada, y lo más importante, ha de tar.
Nel ámbetu estatal, Asturies, nun pue quedar nuevamente arrequexada a la nada. Ye dicir, dientro de los posibles espacios de confluencia nunes elleiciones xenerales, Asturies ha de tener, igualmente voz propia. Siguiendo la propuesta de Rufián, que me paez bastante pragmática, los territorios han d’articulase y confluyir llueu, lo que nun significa que los espacios políticos esllíen o desapaezan; o que terminen toos nuna suerte d’espaciu Sumar 2.0. Ye dicir, por poner un casu, Rufián, siguiría apresentándose per Barcelona y computaría xunto a l’articulación territorial catalana que se formare, nos diputaos y diputaes catalanes. Lo mesmo con Bildu, lo mesmo con quien quiera ponese d’exemplu. Lo que nun ye de recibu ye siguir zarapicando y dexando esi espaciu de poder que ye la Institución a Los de Siempres.
Por exemplu, si garramos como casu les elleiciones xenerales de 2015, que foron especialmente agradables pa les izquierdes más alló del famosu PSOE; en Catalunya los Comunes, articulaos en Comú Podem (Barcelona en Comú, Podem, ICV, EUiA y Equo), ganaron les xenerales col 24,73% de los votos (12 escaños), siguíos d’ERC col 15,98% y 9 escaños. Esto ye qu’aportando una candidatura frenteamplista atroparíen -nesi momentu dulzayu postquincemayista-, 40,71% de los votos emitíos. Si traducimos esi resultáu a la propuesta de Rufián y dando por fecho que la xente que votó en 2015 nun morriere, ye dicir sigue pudiendo ser interpelao, el resultáu n’escaños sedría d’unos 24 escaños de 48 escaños na actualidá (32 Barcelona, Girona y Tarragona 6, y Lleida 4), ye dicir la metá de los escaños quedaríen atropaos a la manzorga del PSOE. PSC-PSOE nesi casu sedría segunda fuercia con 7, and so on.
El casu vascu ye bien asemeyáu, neses elleiciones de 2015 tamién ganó la candidatura qu’encabezaba Podemos con un 25,97% (5 escaños) de los votos, con un Bildu que d’aquella foi tercer fuercia con un 15,07 (2 escaños), ye dicir, siguiendo la mesma llinia anterior: 41,04% del votu emitíu. Nesi casu, la representación d’esos resultaos nel Congresu sedría, non de 5 + 2, sinón de 10 escaños de los 18 disputaos neses elleiciones.
Agora vaigamos al casu gallegu, otru de los exemplos continuaos nos maxinarios soberanistes, pesie a nun ser quien a quitar al PP de Galicia de la Xunta Galega. En Galicia en 2015 apresentábase Podemos-En Marea-Anova-EU qu’atropó un significativu segundu puestu con 25,04% (6 escaños) de los votos emitíos, siendo que Nós, con un 4,32% nun obtuvo dengún escañu. La xuntanza entós de dambos espacios aumentaría en dos escaños más, llegando a 8. Quiero recordar que’l BNG nes elleiciones de 2023 obtuvo un 9,41% del votu (5 puntos penriba de Nós, cuásique 20 pembaxo de Podemos-En Marea-Anova-EU), quedando per detrás de Sumar (2 escaños y 10,92%).
Darréu veamos el casu asturianu. Nes elleiciones de 2015 hebo otra folixa del despropósitu onde s’apresentó Podemos Asturies per un llau (21,33% y 2 escaños), y de nuevo otra fuercia bultable pero insuficiente, Unidad Popular (8,45% y 0 escaños). Esto ye, que diendo xuntes algamaríen un 30% aprox del votu y un escañu adicional pudiendo quedar penriba del PP que foi quien ganó aquelles elleiciones xenerales siguío mui de cerca de la FSA-PSOE.
Nun ye nada caprichoso axuntar pa emburriar, non solo pa resistir, puesto que de manera efeutiva no sociolóxico y no demoscópico la sociedá asturiano ye d’izquierdes pero non imbécil, y énte la parsimonia de la FSA y les hosties en forma de telenovela de la izquierda de la izquierda, pues sí, queden en casa. Y esto, obviamente, nun ye una dinámica particular d’Asturies. Probablemente onde esto ta correxío de meyor manera -precisamente polo que comentábemos al entamu-, ye n’Euskadi.
Pero esto nun ye solo una custión interna asturiana, o estatal. Asturies, como país atlánticu, ha de plantegar rempuestes y estratexes tamién nel ámbetu internacional, especialmente dientro de la XE, xunto a los territorios que componen el denomáu como Arcu Atlánticu. Oficialmente ta integrao como rexón d’importancia xeoestratéxica y económica y compuesta por dellos territorios ensin estáu, más Irlanda; o al traviés de los propios mandatarios estatales a los que pertenecen estos territorios atlánticos.
El 1 d’avientu de 2025 foi la última cumbre de la Comisión Arcu Atlánticu. Esta comisión ye una de les seyes comisiones de la Conferencia de les Rexones Perifériques Marítimes (equí habría que plantegar como bien fai Matute munches veces, periferia de quién, pues nós, pa nós, somos y hemos ser centralidá).
Asina, cabe preguntanos: ¿Cuála ye l’actividá d’Asturies pa colos sos “aliaos” naturales, colos que compartimos instituciones culturales tan notables como’l Festival Intercélticu d’An Orient, amás de participar d’elles? Bono, pues pa quien nun lo sepa participa formalmente, y la propia XE tien decidío incorporar la Macrorrexón Atlántica a partir de 2027 como una exa más, asina como lo ye Báltico, Danubio, Adriático-Xónico y Alpes. Por supuestu, los territorios que la comprenden escede a los representaos nel Intercélticu, pero ye que dientro d’esa Macrorrexón, los llamaos países celtes puen igualmente presionar conxuntamente influyendo les polítiques de la mesma, y n’estensión influyir nes polítiques europees nel so conxuntu.
Nesi sen, y tamién, habrá de coalligase internamente nel Estáu en términos del Noroeste, xunto a gallegos, llioneses o cántabros. Ye dicir, la xuntanza d’esa izquierda a la izquierda, territorializada y asturianista, nun pue obviar la posición d’Asturies nel mapa, nes dinámiques xeopolítiques, o biorrexonales que-y afeuten.
Ye de responsabilidá’l favorecer que n’Asturies namái esista una candidatura tresformadora, territorializada, y poro, soberana; ya internacionalista, que busque aumentar el so resultáu p’aumentar al tiempu la so influyencia en toles estayes posibles.
Porque sinceramente, da un poco igual el “Tier” que faigamos del aspeutu que faigamos, pa un poco vanaglorianos de nós mesmos, de nós mesmes, si llueu nun se tien dengún tipu de capacidá formal d’afeición a la realidá, que de manera direuta carecen los y les asturianes.
