Con un pie nel urbanu y otru nel rural, nel rock y na música tradicional, Rubén Bada llevaba tiempu barruntando la necesidá de sacar un discu propiu, y los sos trenta años sobre los escenaris fueron la excusa pa “abrir les compuertes” y publicar el so primer álbum en solitariu: “Rubén Bada”.
“Nos primeros discos ún siempre quier meter too lo que tien”, explica’l músicu asturianu, que reconoz el vértigu d’enfrentase al so primer trabayu ensin una banda na que sofitarse: “cuando vas solo nun tienes a naide pa ponete llendes y, si la cagues, nun tienes a naide que te rescate”.
El músicu, que tamién forma parte de la banda de Rodrigo Cuevas, aparca per un tiempu proyectes como La Working Class, xunto a Mapi Quintana, o L-R, el dúu de postfolk que forma con Leticia Baselgas, pa entamar una xira que lu llevará, de momentu, a la Seronda en Danza de Grau (15 de payares), Taberna Narciso, Teberga (29 de payares), Lata de Zinc, Uviéu (30 de payares), Meidinerz Jazz Club, Xixón (18 d’avientu), Celtit Odissey, Glasgow (26 de xineru). Son les primeres cites d’una xira que, sobre too, quier disfrutar, a pesar del respetu que-y impón salir solo al escenariu.
El discu, que yá se presentó nel mes de setiembre pasáu en La Benéfica de Piloña, plantegase como un trípticu onde cada bloque representa trés cares estremaes. Una parte son canciones tradicionales, “con delles lletres adaptaes a la forma que güei tenemos d’entender el mundu”; otres, melodíes interpretaes col violín recuperando l’estilu de los vieyos vigulineros asturianos; y, por último, una parte de guitarra solista onde s’adapten temes populares a esti instrumentu. “Tocar canciones tradicionales con guitarra solista, como si fuera un pianu, ye daqué que esiste en Escocia o Bretaña, pero que hasta agora ye bien poco común n’Asturies”, esplica Bada, que señala que una de les sos preocupaciones a la d’albidrar el discu ye que seya, na so mayoría, adaptable pal baille.
Omnívoru nes sos influencies, dende’l rockabilly a Ry Cooder, el flamencu o les músiques del arcu atlánticu, nel discu, xunto al músicu asturianu, collaboren Pepín de Muñalén a les flautes, Leticia Baselgas y Rodrigo Joglar a les percusiones. Tamién Elías García, que dexó dos temes grabaos antes de la so prematura desapaición.
Virtuosu y lluminosu, l’esperáu debut d’unu de los meyores y más inquieros músicos de la escena asturiana yá pue escuchase en Bandcamp.
